நண்பர், தோழர், சகோதரர் ஸ்ரீராம்-இன் ஆலோசனைபடி நாம நம்ம அனுபவங்களை இங்கே பகிரலாம்லு சொல்லிட்டார். விகடன் நம்மை அடித்து துரத்தினாலும் நண்பர் ஸ்ரீ விடுவதா இல்லை போல. அப்படி என்ன இந்த ராமநாதன் சந்திச்சான். அதுல இவன் அனுபவம் என்ன.? அதனால என்ன ஆச்சு இவனுக்கு.? சொல்றன்.. சொல்றன்.
ஆர்வக்கோளாறுல எடுத்த உடனே கோதாவுல குதிச்சு இப்ப வரைக்கும் வெத்துவேட்டாவே சுத்துறது யார்.? சென்னை ஆபிஸ்ல யார கேட்டாலும் பட்டுனு சொல்ற பெயர் ராமநாதன்(புகழாதீங்கப்பா.!!) ஆனா எனக்கும் மோட்டார் விகடனுக்கும் ஏதோ தொடர்பு இருக்கு.!! மோட்டார்னா எனக்கு ரொம்ப பிடிக்கும்.
ஒரு நாள் மோட்டார் விகடன் ஸ்டூடண்ட் ஹெட் பாலமுருகன் என்னை சென்னை இருங்காட்டுக்கோட்டையில் இருக்கும் ரேஸ் ட்ராக்கில் நடக்கும் சர்வதேச ரேஸ்க்கு செல்ல சொல்லியிருந்தார். அது மோட்டார் விகடன் ஸ்பெஷல் அண்ணன் சார்லஸ் மூலம் எனக்கு கிடைத்தது. சர்வதேச ரேஸ்க்கு நம்ம ஐடி கார்டை வைத்துக்கொண்டு செல்வது கடினம் என்பதை நீங்கள் புரிந்துகொள்ளவேண்டும். சாதாரணமாக தமிழ் பத்திரிக்கை என்றாலே சர்வதேச ரேஸ்களில் ஒரு மாதிரி தான் பாப்பாய்ங்க. அதுக்கெல்லாம் கவலையே படகூடாது.
முதல்ல இந்த வொர்க்கை நமக்கு ஏற்படுத்து கொடுத்த அண்ணன் சார்லஸ்க்கு போன் போட்டு என்ன செய்யவேண்டும் என்பதை கேட்டுகொண்டேன். அவரிடமிருந்து சம்பந்தபட்ட இடத்தில் நமக்கு வழிகாட்டபோகும் நபரின் போன் நம்பரையும் கேட்டு வாங்கிகொண்டேன். ரேஸ் ஆரம்பிக்கபோகும் மெட்ராஸ் ரேஸ் க்ளப் ட்ராக்கின் வாசலிலே மடக்கிட்டாங்க. சர்வதேச ரேஸில் மீடியா பர்சனாகவோ செல்லும் போது அவருக்கென தனியாக கொடுக்கப்படும் கார்டுகளை பெற்றிருக்கவேண்டும். ஆனால் எனக்கு இந்த ஆர்டிக்கல் பத்தி நியூஸ் தெரிந்தது முந்தைய நாளின் இரவு தான் என்பதால் என்னால் கார்டு வாங்க முடியவில்லை. கூட வந்த சீனியர் போட்டாகிராபர் நாகமணியும் நானும் ஒருவரை ஒருவர் பார்த்துகொண்டோம். எங்களை உள்ளே விட மறுத்துவிட்டனர்.
உடனே, அங்கே பொறுப்பாளருக்கு போன் அடித்து விசயத்தை சொன்னேன். அவர் அங்கேயே இருங்கள் வந்துவிடுகிறேன் என்றார். ஒன்று நாம் எப்போதும் புரிந்துகொள்ளவேண்டியது நமக்கு வேலை முடியவேண்டும் என்பது தான். இன்னும் கொஞ்ச நேரத்தில் ரேஸ் தொடங்க இருக்க அங்கேயே காத்திருந்தால் எங்கிருந்து நாம் ரேஸை பற்றி விவரம் அறிய முடியும்.? அதனால் அவருக்கு போன் செய்து எங்களது நிலையை சற்று கடுமையாக விளக்கினேன். அங்கே எங்களை உள்ளே விட மறுத்த காவலாளியிடம் போனை கொடுத்து எங்களுக்கு விசிட்டர் கார்டு கொடுத்து உள்ளே அனுப்பிட்டனர். ஆனால் அதுமட்டும் போதாதே.!! அது இருந்தால் சற்று தொலைவில் இருந்து தான் பார்க்க முடியும். உள்ளே சென்ற நாங்கள் அவருக்காக காத்திருந்தால் ரேஸ் மிஸ் ஆகிவிடும் என்று அந்த ரேஸை நடத்தும் எம்.ஆர்.எஃப்., நிறுவன ஆட்கள் என்று சொல்லிவிட்டு உள்ளே புகுந்தோம்(இந்த மாதிரி அப்பாடக்கரு வேலையெல்லாம் செஞ்சது நானே.!!)
ஆனால் முதல் ரவுண்டு முடிந்ததும் அவர் வந்துவிட்டார். உடனே ப்ரஸ் ரூமில் புகுந்து ப்ரஸ் ஐடி கேட்டோம். போட்டோ எடுக்க கண்டிப்பாக ஒரு 'கோட்' கொடுப்பார்கள். அதை அணிந்தால் தான் ட்ராக்கில் இறங்கி போட்டோ எடுக்கவேண்டும். சர்வதேச ரேஸ் என்பதால் அதற்கான 'டெபாசிட்'டாக 500 ரூபாய் கேட்டார்கள். ஆனால் எங்கள் இருவரிடம் சேர்த்தே 400 ரூபாய் தான் இருந்தது. எங்கள் நிலையை விளக்கிய பின்னர் அவர் தான் போன்லயே நமக்கு ரொம்ப பழக்கமானவரா ஆயிட்டாரே, அதுமட்டுமில்லாம சார்லஸ் அண்ணன் அங்க எல்லாம் பயங்கர பேமஸ். அதனால அவரே எங்களுக்கு காசு கொடுத்திட்டார்.
பிறகு போய் ரேஸை கவனிக்க தொடங்கினேன். ஒண்ணும் புரியல.! யார் பெயரும் வாயில நுழையல. அடிச்சு புடிச்சு ப்ரஸ் ரூம் போய் ரேஸ் டேடா கேட்டு வாங்கினேன். யார் யாரெல்லாம் எந்தந்த லேப்பில் முன்னர் வருகிறார் என்பதை கவனித்து வந்தேன். பின்னர் வீட்டுக்கு போய் சிஸ்டம் முன்னாடி உக்காந்து நான் கவனித்து எல்லாவற்றையும் சேர்த்து ஒரு ஆர்டிக்கல் எழுதி பாலமுருகன் சார்க்கு அனுப்பினேன். அடுத்த நாள் காலையில அவருகிட்ட இருந்து போன். சிரிச்சுகிட்டே பேசினார். ரொம்ப சூப்பரா எழுதிட்டோம் போலனு நானும் என்ன சார்னு கேட்டேன். உன்னுடைய ஆர்டிக்கல் வச்சு ஒண்ணுமே ஒப்பேத்த முடியலப்பானு சொல்லிட்டு திரும்பவும் சிரிச்சார். ஆபிஸ்க்கு வர சொன்னார். கொஞ்ச நாள் கழித்து போனேன். ஆர்டிக்கல் ஒரு மார்கமா இருந்தது. என்னது இது நாம எழுதின மாதிரியே தெரியலையேனு என்னுடைய அர்டிக்கலையும், அதையும் ஒப்புமை படுத்தி பாத்து ஒரு சில விசயங்கள் கத்துகிட்டேன். அதற்கு பிறகு இரண்டு ரேஸ், இரண்டு ரேஸ் கோச்சிங் என இருங்காட்டுகோட்டை நம்ம பக்கமாயிடுச்சு. ரேஸ் ஆர்டிக்கலுக்கு என்ன செய்யவேண்டும்.?
** ஒரு ரேஸ்க்கு போகும் போது அது எந்த மாதிரி ரேஸ், அதற்கு நாம் கையில் என்ன வைத்திருக்கவேண்டும் என்பதை அங்கே சம்பந்தபட்டவரிடமும், நம்மை அனுப்பியவரிடமும் தெளிவாக கேட்டு வாங்கிடவேண்டும்.!
** பிறகு நாம் போக போகும் ரேஸின் முந்தைய விவரங்களை கேட்டோ அல்லலது இணையத்தின் மூலமோ அறிந்திருக்க வேண்டும்.
**பங்கேற்பாளர்களை பற்றியும் அவர்களது விவரங்களையும் சேகரித்து அறிய வேண்டும்.
**ஆர்டிக்கல் எழுதும் போது் ரேஸின் முந்தைய, அன்றைய அதன் பின்னர் நிலவரங்களையும் ஒப்புமை படுத்தி எழுதவேண்டும்.
**தெளிவில்லாத விசயங்களை எழுத கூடாது.
இன்னும் நிறைய விசயங்கள் இருக்கு. பதிவின் நீளம் கருதி இதோடு முடிக்கிறேன். மற்ற நண்பர்களின் அனுபவத்தையும் கேட்க ஆவலோடு இருக்கிறேன். விகடனுக்கு பெருத்த நன்றிகள்.! மற்றும் இந்த யோசனையின் அடிப்படையான ஸ்ரீ ஒரு சிறப்பான வேலைபாடை செய்திருக்கிறார் என்று சொல்ல வேண்டும் நன்றி!
நண்பர்கள் இதில் பதிவு போடும் போது லேபிளில் அவரவரது பெயரையே எப்போதும் போடுமாறு கேட்டுகொள்கிறேன்.!!
No comments:
Post a Comment